“इजाबेला म्युझीक अँन्ड एंटरटेनमेंट प्रस्तुत, बेला सॅमसन ग्रेशियस” निर्मित आणि प्रविण राजा दिग्दर्शित तुझीच रे या मराठी चित्रपटाचे पोस्टर नुकतेच प्रदर्शित झाले आहे. तुझीच रे चित्रपटाची गोष्ट एका वेगळ्या प्रेमकथेवर आधारीत आहे. हि प्रेमकथा एका छोट्याश्या गावात घडते. पाटलाची मुलगी आणि ख्रिश्चन मुलगा यांच्यामध्ये हि प्रेमकथा ऱंगते.
या चित्रपटामध्ये अक्षय कांबळी आणि प्रियांका यादव यांच्याबरोबरच मिलींद गवळी, सुमुखी पेंडसे, आनंदा कार्येकर आणि प्रतीभा शिंपी यांच्यादेखील महत्त्वपूर्ण भूमिका आहेत. चित्रपटामध्ये फ्रान्सिस जीगुल आणि अनिरूद्ध काळे यांचे संगीत आहे. तर छाय़ांकन राजा फडतरे यांनी केले आहे.
दिग्दर्शक प्रवीण राजा सांगतात की, हि प्रेमकथा वेगळी दोन कारणांमुळे आहे, एक म्हणजे मराठी मुलगी आणि ख्रिश्चन मुलगा आणि दुसरे म्हणजे सिनेमाचे संगीत. कोणतीही प्रेमकथा सुमधुर, गाणी आणि संगीत यांच्याशिवाय पूर्ण होेेऊ शकत नाही. या चित्रपटाचे संगीत हा सिनेमाचा आत्मा आहे. सुमधुर गाण्यांमधून गोष्ट पुढे जात राहते.
अक्षय कांबळी हा नविन अभिनेता सिनेमासृष्टीमध्ये पदार्पण करतो आहे. त्याला प्रियांका यादव हिने उत्तमरित्या साथ दिली आहे. सिनेमात सुमुखी पेंडसे यांची अफलातून भूमिका आहे तर मिलींद गवळी एका वेगळ्या भूमिकेत बघायला मिळणार आहे. सिनेमाचे चित्रीकरण पूर्ण झाले असून लवकरच सिनेमा प्रेक्षकांच्या भेटीला येत आहे.
