भाऊराव नानासाहेब कऱ्हाडे दिग्दर्शित, ‘बबन’ २९ डिसेंबर रोजी प्रदर्शित होणार !
राष्ट्रीय पुरस्कारप्राप्त ‘ख्वाडा’ नंतर नवीन कलाकृती.
‘ख्वाडा’ या आपल्या पहिल्याच चित्रपटातून सिनेप्रेमींचे लक्ष वेधून घेण्यात यशस्वी ठरलेले राष्ट्रीय पुरस्कार विजेते भाऊराव नानासाहेब कऱ्हाडे हे आता ‘बबन’ हा चित्रपट घेऊन येत आहेत. बबन या चित्रपटातून एका महत्वाकांक्षी उद्योजक तरुणाची प्रेमकथा ते रंगविणार आहेत. या चित्रपटासाठी लेखन आणि दिग्दर्शन असे दुहेरी आव्हान भाऊराव कऱ्हाडे यांनी पेलले आहे.
या चित्रपटातील ‘साज ह्यो तुझा’ हे अप्रतिम गाणं सोशल मीडियावर प्रदर्शित झाले असून या गाण्याला उत्तमोत्तम कमेंट्स आणि साडेतीन लाखाहून अधिक मिळणाऱ्या लाईक्सच्या माध्यमातून प्रेक्षकांचे भरभरून प्रेम लाभत आहे.
‘फुल ऑन एंटरटेनमेंट’ अशा ‘बबन’ या चित्रपटाची प्रस्तुती ‘चित्राक्ष निर्मितीने’ केली आहे. ‘ख्वाडा’ फेम भाऊसाहेब शिंदे आणि या चित्रपटामधून पदार्पण करणारी ‘फ्रेश लूक’ची अभिनेत्री गायत्री जाधव यांच्यासह शीतल चव्हाण, देवेंद्र गायकवाड, योगेश डिंबळे, अभय चव्हाण, सीमा समर्थ, कृतिका तुळसकर, मृणाल कुलकर्णी यांची प्रमुख भूमिका असलेला‘बबन’ हा चित्रपट येत्या २९ डिसेंबर रोजी संपूर्ण महाराष्ट्रात प्रदर्शित होणार आहे. तरल प्रेमाचे नवे आयाम मांडून प्रेमाला एका वेगळ्याच उंचीवर नेणारा ‘बबन’ प्रेक्षणीय ठरणार आहे हे नक्की.
