मराठी रंगभूमीवर गाजलेलं, अभिनेता सिद्धार्थ जाधवला अभिनेता म्हणून वेगळी ओळख दिलेलं जागो मोहन प्यारे हे नाटक आता चित्रपटाच्या रुपानं प्रेक्षकांसमोर येत आहे. प्रियदर्शन जाधव लिखित-दिग्दर्शित हा चित्रपट अमेय विनोद खोपकर प्रस्तुत करत आहेत.
स्वरुप रिक्रिएशन अँड मीडिया, लोकीज स्टुडिओ आणि अमेय विनोद खोपकर प्रस्तुत या चित्रपटाचे स्वाती अमेय खोपकर, आकाश पेंढारकर, सचिन नारकर, विकास पवार, सचिन मारुती लोखंडे, अतुल जनार्दन तारकर, विक्रम बरवाल निर्माते आहेत. तर निनाद नंदकुमार बत्तीन आणि तबरेज पटेल सहनिर्माते आहेत.
मूळ नाटकात मोहनची भूमिका केलेला अभिनेता सिद्धार्थ जाधवसह अनिकेत विश्वासराव आणि दीप्ती देवी यांच्या चित्रपटात मुख्य भूमिका आहेत. नाटकाचं लेखन आणि दिग्दर्शनही प्रियदर्शन जाधवनंच केलं होतं. चित्रपटाचं पोस्टर सोशल मीडियाद्वारे लाँच करण्यात आलं असून, चित्रपटाच्या चित्रीकरणाला सुुरुवात झाली आहे. नव्या वर्षात हा चित्रपट प्रेक्षकांच्या भेटीला येईल. मराठी रंगभूमीवर दमदार प्रतिसाह मिळवलेल्या ‘मोहन’ची नक्कीच उत्सुकता निर्माण झाली आहे.
