मित्रांनो! टेलिव्हिजन हा आजच्या घडीला आपल्या दैनंदिन जीवनाचा जणूकाही एक अविभाज्य घटकच होऊन बसला आहे. टेलिव्हिजन वरील मराठी हिंदी मालिका आणि त्यातील पात्रांशी रसिक प्रेक्षक इतका समरस झालेला आहे की, तो त्या पात्रांशी, त्यांच्या भावनांशी चक्क स्वतःला रिलेट करत असतो.
टेलिव्हिजनच्या या रसिकप्रिय क्षेत्रातील सर्वकालीन लोकप्रिय मालिकांचे जेंव्हा कधी नावे घेतली जातील, त्यामध्ये “पवित्र रिश्ता” या मालिकेचे नाव त्या यादीत नक्कीच राहील, यात कोणालाही शंका असण्याचे कारणच नाही. या हिंदी मालिकेने एकेकाळी रसिकांच्या मनावर अधिराज्य गाजवत प्रत्येक घराघरातून प्रेक्षकांचे प्रेम मिळविले होते.
या मालिकेतील अर्चना(अंकिता लोखंडे) व मानव(सुशांत सिंग राजपूत) या जोडीला तर प्रेक्षकांची खूपच जास्त पसंती मिळाली होती. म्हणूनच या मालिकेने तब्बल पाच वर्ष टेलिव्हिजन मालिका जगतात टॉप ट्रेंडिंग करून राज्य केले होते. गेल्या वर्षी सुशांत सिंग राजपूत या गुणी अभिनेत्याचे दुर्दैवी निधन झाल्यानंतर “पवित्र रिश्ता” या मालिकेची सर्वांनी आवर्जून आठवण काढलेली आपणां सर्वांना आठवत असेलच.
कारण सुशांतच्या अभिनयाची खरी सुरुवात पवित्र रिश्ता या मालिके पासूनच झाली होती. आणि बहुदा याच कारणाने अनेकांनी पुन्हा एकवार पवित्र रिश्ताचे दुसरे सिझन सुरू करण्याची मागणी निर्मात्यांकडे केली. सांगायला आनंद वाटतोय की, त्यामुळेच पवित्र रिश्ता मालिकेच्या दुसऱ्या सीझनच्या शूटिंगची सुरुवात झाली असून यात काही जुने तर काही नवीन कलाकार दिसून येणार आहेत.
पवित्र रिश्ता मालिकेच्या नवीन सीझन मध्ये अर्चनाच्या भूमिकेत अंकिता लोखंडे हीच असून मानवची भूमिका शाहीर शेख हा अभिनेता साकारणार आहे. तसेच, या मालिकेसाठी आता आणखीन एक मराठमोळा चेहरा मालिकेच्या फॅन्ससमोर दिसून येणार आहे. अभिनेत्री अभिज्ञा भावे ही या मालिकेत मुख्य भूमिका साकारताना दिसून येणार आहे. अभिज्ञा भावे हिच्यासाठी ही एक मोठीच संधी आहे.
या आधी झी मराठी या लोकप्रिय वाहिनीवरील खुलता कळी खुलेना, तुला पाहते रे या मराठी मालिकांमधून लोकप्रियता मिळविणारी अभिनेत्री अभिज्ञा भावे हीने नुकतेच बावरा दिल मालिकेद्वारे हिंदी मध्ये पदार्पण केले होते. आता परत एकदा ती नवीन भूमिकेतून प्रेक्षकांचे मनोरंजन करताना दिसणार आहे. तसेच, या मालिकेत ज्येष्ठ अभिनेत्री उषा नाडकर्णी या देखील प्रेक्षकांना दिसून येणार आहेत.
