Who will win Maharashtras first Sangeet Samrat

1635

कोण होईल महाराष्ट्राचा पहिला “संगीत सम्राट “?

संगीत अर्थात सूर, लय आणि ताल यांचा सुरेख संगम. संगीताची ही किमया महाराष्ट्राच्या संस्कृतीचा गाभा आहे. महाराष्ट्राला संगीत परंपरेचा मोठा वारसा लाभला आहे. प्रत्येक माणसाच्या आयुष्यात संगीत व्यापून राहिले आहे. किंबहुना माणसाच्या आयुष्यातील प्रत्येक भावना तो संगीताच्या सोबतीने अनुभवतो…जगतो. अश्या संगीतावर भरभरून प्रेम करणाऱ्या  मराठी प्रेक्षकांसाठी झी युवा ही वाहिनी “संगीत सम्राट हा एक अनोखा  संगीतमय कार्यक्रम  घेऊन आली आहे . महाराष्ट्राच्या मातीत रुजलेले अनेक गायक , वादक आणि ज्यांच्या श्वासात संगीत आहे असे अनेक कलावंत संगीत सम्राटाच्या व्यासपीठाद्वारे  मराठी रसिकांसमोर त्यांची कला सादर करणार आहेत . महाराष्ट्राचा आघाडीचा गायक आदर्श शिंदे सूर ताल आणि लय या मुद्द्यांद्वारे कलाकारांचे  परीक्षण करणार  आहेत  तर मराठी चित्रपट सृष्टीतील  आघाडीची नायिका क्रांती रेडकर वानखडे कलाकारांच्या परफॉर्मन्स किती मनोरंजनात्मक आहेत याचे  परीक्षण करणार आहेत . त्याच प्रमाणे  तरुणाईचा लाडका गायक रोहित राऊत आणि अभिनेत्री उर्मिला निंबाळकर यांनी निवेदनाची भूमिका सांभाळली आहे . प्रेक्षकांना हा कार्यक्रम २६ जून पासून सोमवार ते शुक्रवार रात्री ९ वाजता झी युवावर पाहण्याची पर्वणी मिळणार आहे

कलाकाराच्या कलेचे चीज करणारी पारख नजर असेल तर समाजातील कोणताही कलाकार रसिकांसमोर येऊ शकतो या विश्वासातून झी युवाने Sangeet Samrat “संगीत सम्राट” या संगीतावर आधारीत वेगळ्या संकल्पनेला आकार दिला आहे.  झी युवा आणि झी टॉकीज चे व्यवसाय प्रमुख ‘बवेश जानवलेकर’ यांनी “संगीत सम्राट” या कार्यक्रमाच्या निमित्ताने सांगितले की, “मराठी प्रेक्षकांची संगीत क्षेत्रातील आवड लक्षात घेऊन फार कमी कार्यक्रम आजवर छोट्या पडद्यावर आले आहेत . छोट्या पडद्यावर प्रेक्षकांना तो आनंद आजवरअनुभवायला मिळाला नाही. सर्वसामान्यांमध्ये दडलेला आणि संगीताशी नाळ जोडलेला कलाकार समाजासमोर यावा, त्याचप्रमाणे कलाकारांसोबत चांगला श्रोता घडावा या हेतूने,  झी युवाने गेल्या महिन्याभरापासून महाराष्ट्राचा कानाकोपरा पिंजून काढला. त्यात झी युवा ने आणलेल्या या संधीच सोनं करत संगीत कलाकारांनी महाराष्ट्रातील ६ शहरांमध्ये घडलेल्या निवडचाचणी मध्ये हजारोंच्या संख्येने उपस्थिती लावली . कुणी ढोल वाजवून तालाशी समरस झालेला तर कुणी गाण्यातील प्रयोगशील सुरांमध्ये रमलेला, कुणी पारंपरिक वाद्यातून नवे झंकार देणारा तर कुणी हाताला येईल ते काहीही वाजवून कान तृप्त करणारे कलाकार मुंबई, पुणे, नागपूर, कोल्हापूर, औरंगाबाद आणि नाशिक  या शहरांमधून कलाकार शोधून काढले .  ज्यांच्या श्वासात संगीत आहे अश्या कलाकारांसाठी  झी युवा एक नवीन व्यासपीठ घेऊन आले आहे आणि संपूर्ण महाराष्ट्राला खणखणावून एकच प्रश्न विचारत आहे की  “कोण होईल महाराष्ट्राचा पहिला  “संगीत सम्राट “?”

“संगीत सम्राट “या मालिकेच्या निमित्ताने मराठी प्रेक्षकांना अश्या अनेक कलाकारांना भेटायला मिळणार आहे ज्यांच्या संगीतमय आयुष्याचा  प्रवास प्रत्येकासाठी प्रेरणादायी ठरू शकेल . यात असे कलावंत आहेत जे अगदी हलाखीच्या परिस्थितीतही आपली संगीत साधना जोपासली आहे. तर काही स्पर्धकांच्या जवळच्या लोकांनी कलेच्या यशासाठी केलेले त्याग थक्क करणारे आहेत. आपल्याला सर्वज्ञात नसलेली नानाविध वाद्य या कार्यक्रमाच्या निमित्ताने ओळखीची होतील.  आधुनिक आणि पारंपरिक संगीताचा अनोखा  मेळ या कार्यक्रमामुळे रसिक प्रेक्षकांना पाहण्याची पर्वणी झी युवाच्या “संगीत सम्राट” या कार्यक्रमामुळे  मिळणार आहे .